quatro pase.........i ricorde......

	Tante ote don lontëgn par fei quatro pase ma basta dì via del Pieze e ciapa inze la strada par Godnele- i Giai. La strada e bela d'istiade ma anche d'inverno, se nenè masa nëve.Par un tin e drëta ma dopo va su pompiën con i tornante.
	I giai che viste da Giaule someia brute, sù in auto e bëi e caminën al pensiër va al tempo passò, alla vita che se vivea tra i bosche.
	Su a Godnele al bosco se verde ntin e se pë vëde le Trei Terze. Se pë di dù verso Costauta al trèi e alolo liò dla ma stota don in sù verso Tabiosto. Al trèi e pëna segnò ma basta di in sù.
Dvane avea 69 ane (1854-1923), era inverno e era du sù da solo con la lioda a tole lëgne. Dad sèra non la pì visto tornà e dude su e l'a cetò morto. Era dù sote i udis dla lioda.	A Tabiosto se va inze verso la Val Granda e se reva alla cros de Dvane che e là sote na pianta e durarà fin cla pianta la quardarà.
	Dala cros al trèi porta su sulla strada ingiarada vizin a Aga fina. La vëna bicia sempro un filo d'aga giazò anche in agosto. Se torna indoi verso Piën Tamai e se ciapa dù par al dizon verso Corul.
	Zla mandra de Corul ceton ncamò l'bore che Bepo dla Costa avea fatto. In mènte torna al ricordo de Bepo che avea fatto una vita zi bosche. Era du zel foreste dal Canada par tance ane. Era tornò, tignia nëta la tera, dea a fëi legne come da sempro. Al destin avea deciso che zal bosco dovea morì e csì e stò.Na pianta svarsada dal maltempo, Bepo tenta da taiè al bocon tacò e la radis se piega come na molla e lo soplis. Dad sera, come Dvane, e dude a cetalo, era sote la radis. La vita......al destin.....
E ncamò là la radis e i bocogn dla pianta cla soplù.

Vegn da pensà a etre morte zal bosco: Osvaldo dla costa che è morto zi ane 50', era al primo dì de laoro par la regola de Costa. A bagarò d'sì par che i imbigne dù la taia ma dopo, forse e sbrisò o ingiambarò e nenè pì riusù a giavase dala lisa e la taia lo a ciapò in pieno.
Etre morte par al pasò in Visdende, chël che se ricorda da più e la "cros d'Amadio" che segna un posto dla val, era da Costlisëgn.

Apëna pì in là i barche de Corul. Sarade dal bosco, zenza strada.... resta un ricordo. Al barco di Gialuche, di Croz, di Baiaza (che e ncamò in pes), chël di Fronze che non se vëde pì. Al ricordo e chël di prades che in agosto gnea siede e dai barche, d'inverno con la lioda, se dea a tole al fëgn.